القائمة الرئيسية

الصفحات

قواعد الشغل في السودان



قواعد الشغل :

-من حق روحك عليك انك ما تربط تلفونك بي ايميل الشغل.
-السوشيال ميديا بتاعتك ما عندها علاقة بالشركة! ينبزوها يعملو ليك تاق ما يخصك! في ناس بيدوهم مرتب عشان يردوا!
-لو جاك تلفون من نمرة غريية ورديت "قال ليك انا علي اداني رقمك احمد ودايرك في خدمة محل انت شغال" حل مشكلة علي واعمل بلوك لي احمد! وممكن تعمل بلوك لي علي بعديها! لكن اهم شي بلوك لي احمد!
-مديرك لو قال ليك بنصلح ليك مرتبك ووضعك قدام وانت صدقت اعرف انك اتلعبت!
-ما تكتب انت شغال وين في الفيسبوك!
-حساب الفيسبوك اسمو حساب شخصي!
-اوعا تشتغل تريننق من غير قروش!
-اوعا تشتغل تريننق بقروش حبة!
-لو كل شهر بتتدين قروش عشان تتم الشهر استقيل!
-اكتر وظيفة مرهقة وقروشها حبة شغل الكول سنتر! اي صاح نسيت هي ما وظيفة هي "عقد تدريب"!
-اوعا تصدق جملة "انزل وظيفة كول سنتر لحد ما نلقى ليك الوظيفة"!
-ما تشتغل acting محل زول استقال!
-ما تمسك شغل زول استقال اكتر من شهر عشان ما حيجيبو زول محلو!
-القروش اهم منك!
-ما ضروري تضيف " زملاء العمل " في فيسبوك!
-اهم ناس مفروض تصاحبهم في الشركة : الحارس و الزول البنضف ليك مكتبك و الزول البترسل للفطور.
-العمر البتقضيهو وانت شغال قصير فاحسن خليك مع الشغل المريح وقروشو اكتر!
-سيد الدكان وسيد الصيدلية و سيد اللبن ما بهمهم انك تكون شغال في multi national company ولا شغال في السما الاحمر! بهمو جيبك وبس!
-ما تضرب من رصيدك عشان تعمل شغل الشركة.
-المرتب اهم من الـ job description والـ job description أهم من الـ job title .
-البنوك وشركات الاتصالات اكبر كضبة في البلد دي! شغل كتير وقروش حبة! "واجد شغل واجد قرقر مافي فلوس"!
-اي مدير يقل ادبو استقيل منو!
-شيل فطورك معاك و حاول ما تاكل من برة! اصلا غالي وكعب!
-الدوام ٨ ساعات في اليوم! الدوام لله!
-الأوفر تايم خرافة ! مافي حاجة اسمها اوفر تايم!
-هم محتاجنك زي ما انت محتاجهم! وغالبا هم محتاجنك اكتر!
-ما توقع عقد تدريب اكتر من سنة!
-ما توقع عقد ما قريتو كويس!
-ما في حاجة اسمها شرط جزائي! انت ما لاعب في ريال مدريد!
-ما في حاجة اسمها ترجع لينا قروش التدريب لو استقلت قبل سنتين!
-يسقط الرأسمالية !
-ما تتشالق كتير وتتصدر اي موضوع!
-غالباً البمشي لي قدام هو اكتر زول بقدر يتعامل مع عقد مديرو أو عقد مدير مديرو!
-البريزنتيشن الكويس اهم وأفيد من الشغل الكويس!
-انت شغال عشان روحك واهلك! فما تهلك روحك وتقاطع اهلك!
-اسمهم "زملاء عمل" مجبورين على بعض ٨ ساعات! فاستحملو بعض عشان الامور تمشي!
-ما شرط زملاء العمل يكونو اصحابك!
-من حق نفسك عليك انك ما تخش قروبات الواتساب بتاعة الشغل!
-اي شغل بترسل في الواتساب دة ما شغل!
-دايرنك ترد بعد الدوام يدوك تلفون وخط ويفعلو ليك نت!
-دايرنك تشتغل بعد الدوام يجيبو ليك لابتوب للشغل ومعاهو أوفر تايم!العندك دة اسمو لابتوب "شخصي"!
-ما تصرف من جيبك على الشغل!
-سيد الشركة مستكتر القروش على شركتو ؟! من باب أولى انت تسكتر روحك على شركتو!
-ما اي موظف بقدر يبقى "تاجر" أو "رائد أعمال" أو عندو "بزنس خاص"! في ناس مولودين عشان يكونوا باشكتبة!
-قدر ما تتكلم اكتر مديرك بفهم انك شغال اكتر! قصة تشتغل وانت ساكت وترسل الشغل اخر اليوم دي بتضيعك!
-لو قالو ليك ١+١ بتساوي كم اعمل بريزنتيشن!
-أي بريزنتيشن ما فيهو graphs لا يعول عليهو! واصلا مافي زول بقراهو!
-ما تعصر روحك في الزمن في اي تسليم!
-ما تخش في نقاش مع "زملاء العمل" بالذات لو كان ديني ، سياسي أو رياضي! ٨ ساعاتهم دي ممكن تبقى ٨٠ ساعة لو متشاكلين!
-البريزنتيشن الملون ٩٠٪؜ من الشغل!
-مديرك لو قعد يحكي ليك "انو كان بطير" لمن كان شغال في وظيفتك اعرف انك حضنت الماسورة!
- طلعت اجازة اعمل auto reply للايميل ، انك ف اجازة والشخص المسؤول حاليا هو فلان وده ايميلو ، وانو ما حتفتح الايميل لغاية يوم كذا.
-ما اكعب من الاتش ار ، الا الاتش ار العامل فيها فاينانس وبتكلم عن موارد الشركة المهدورة!
-معرفة الـ excel اهم من شهاداتك كلها! اهم من شهادة البكالريوس حتى!
-الـ backup بتاع الايميل اهم منك!
-المدير البقيف معاك لمن تكتم رزق! امسك فيهو قوي!
-النظرية بتقول اي شي غلط هو غلط الزول الما حضر الاجتماع او جا متاخر!
-قصة انهم يزيدو مرتبك بعد اول ٣ شهور بعد يشوفو اداءك برضو خرافة!
-نظرية المدير الناجح بتقول ان المدير الناجح هو البجيب موظفين شطار باقل مرتبات! وقدر ما يجيب موظفين اقل بيخليهم يشتغلو اكتر!
-لو بتصرف بالدولار ممكن تقول salary ! غير دة كلو متاع دنيا زائل!
-ما تحاول تفهم الـ policy بتاعة الـbonus! او تعرف حسبوهو كيف!اسهل تفهم المعادلات التفاضلية والـ calculus!
-مافي وظيفة في الدنيا تستاهل يركبو ليها اكتر من ٣ مواصلات ! يا تمشي جنب الشغل يا الشغل يجي جنبك!
-مرتبك لو ما بكفيك تمشي الشغل كل يوم وترجع بي ركشة وتفطر استقيل!
-ما تستقيل الا وانت متاكد !
-أغلب مشاكل الشغل هي مشاكل بتاعة communication!
-ما في حاجة اسمها الشغل ما بمشي من دوني وانا الكل في الكل! وانا الككو الفجخ الطين! والله "تُنْسى كأنك لم تكن ،تُنْسَى كمصرع طائرٍ،ككنيسةٍ مهجورةٍ ،تُنْسَى كحبّ عابرٍ"
-المدير الما عندو فيسبوك رزق!
-ما تصدق قصة senior blah blah
زيها زي blah blah بس مفروض قروش اكتر!
-وافقت على شغل تشتغلو للنهاية في وقتو ، قصة "قدر قروشهم" وبتاع دي بتضيعك!
-لا تقصر معاهم ولا يقصروا معاك!
-أوعا تستقيل بعدين يحنكوك تغير رايك !لان منظرك حيبقى شين قدام الاتش ار!
-الاتش ار هم الاخترعو كضبة "ما توري زول مرتبك كم" عشان يقدرو يلعبو بالناس ويدوا اي زول مرتب براهو لنفس الشغل!
-ما تدي قفاك للاتش آر!
المصدر: https://www.facebook.com/waleed2k/posts/10157195435706269
 https://t.me/daliljob


reaction:

تعليقات