القائمة الرئيسية

الصفحات


تهيئة طلبة التخصصات التقنية في الجامعات السودانية لمرحلة ما بعد التخرج



بسم الله الرحمن الرحيم
السلام عليكم ورحمة الله وبركاته
موضوع البوست: تهيئة طلبة التخصصات التقنية في الجامعات السودانية لمرحلة ما بعد التخرج
الفئة المستهدفة من البوست:
طلبة المستوى الثالث والرابع والخامس من كليات علوم الحاسوب وهندسة الإلكترونيات وتقنية المعلومات وأي زول خريج حابي يدخل مجالات التقنية او أي زول عندو الرغبة في مجال تقني.
الهدف من البوست:
رفع مستوى الوعي وإرشاد وتوجيه الطلاب لتحديد التخصص العملي أثناء المستويات المتقدمة من الجامعة بهدف تفادي الوقت المهدر في البحث عن التخصص الملائم بعد التخرج ونظراً لأن الكثير من الخريجين يعانون من تحديد المسار المهني بعد التخرج، وأيضاً من الملاحظ إنو في ناس كتيرة أخدت سنتين و3 و4 لحدي ما قدروا يشتغلو في التخصص ودا برضو كان أحد الأسباب للبوست.
عشان كدا أنصح بشدة الطلاب المقبلين على التخرج بالبدء للتحضير للحياة العملية قبل التخرج والإستفادة من الزمن قدر المستطاع عشان تلقى التخصص المناسب والوظيفة المناسبة بعد التخرج في أقرب فرصة بعد مشيئة المولى عز وجل.
طرق التعلم:
عشان تقدر تتعلم التكنولوجيا في شتى تخصصاتها في طرق كتييرة وفي طريقتين أساسيات، الأولى: إنك تحضر كورس اونلاين (Self-study) عن طريق (يوتيوب، مواقع ، كتب أونلاين). والتانية: عن طريق تاخد كورس في مركز تدريب، أنا بفضل الطريقة الاولى دايماً وحاول تعود نفسك عليها لي قدام لو ما كنت قادر عليها في البداية، ولو لقيت نفسك ما قادر تتم الكورس وقاعد تضيع زمن كتير بنصحك تنزل كورس مدفوع طوالي في مركز معروف وموثوق بالنسبة ليك ودايماً حاول تسمع الـFeedback من ناس درست في المركز المعين. أنا شخصياً جربت مركز Kiwi وكان ممتاز جداً بصراحة، الناس ممكن تسأل عنو وفي مراكز تاني غيرو كويسة برضو، ودايماً بقول (استثمر في نفسك قدر ما تقدر وما حتندم).
المهارات الأساسية حسب التخصصات العملية الحديثة المتاحة:
1. Networking Fundamentals
أساسيات الشبكات تعتبر أساس لكل التخصصات والمجالات التقنية الأخرى والـ CCNA من الكورسات المن خلالها ممكن تتعلم مهارات الشبكات الأساسية.
2. Linux Foundation
الـ Linux حالياً واحد من أهم أنظمة التشغيل المفروض المهندس او الطالب يكون عندو عنها فكرة لأنوهو الأساس المبني عليو أغلب المواقع والألعاب والأنظمة المحاسبية وأنظمة المؤسسات وأنظمة الهواتف المحمولة وغيرها.
3. Information Security
أمن المعلومات مجال بيهتم بحماية الأنظمة والمعلومات من التجسس وسرقة البيانات الحساسة والإختراق، أمن المعلومات أصبح حالياً جزء أساسي في كل Businessلأنو بدون أمن المعلومات ممكن يحصل فقدان للبيانات وخصوصاً بيانات المؤسسات الحساسة زي البنوك مثلاً وممكن تخسر كل الـBusiness بسبب الإهمال في حماية أنظمة الشركة أوالمؤسسة.
4. Cloud Computing
الحوسبة السحابية هي باختصارأنو الشركات تقوم بوضع مواقعها وأنظمتها وخدماتها في مزود خدمة حوسبة سحابية معروف بدلاً من وضع تلك الأنظمة في مركز البيانات الخاص بالشركة لتقليل تكاليف التشغيل كأحد الأسباب الأساسية.
5. Python Programming
البرمجة عموماً أصبحت متطلب أساسي لكل التخصصات ومن أهم لغات البرمجة الـ Python .
اللغة الإنجليزية:
ختاماً، اللغة الانجليزية عامل مهم جداً لنجاحك في مشوارك المهني، لأنو بدون اللغة حتواجه صعوبات في تعلم التقنية وكذلك صعوبات في نقل خبراتك العملية للأخرين في مجال العمل سواءً كانو عملاء أٍو زملاء عمل غير ناطقين بالعربية، وعشان كدا أنا بنصح أي زول حاسي إنو عندو مشكلة مع الإنجليزي يعالجها بدري لأنك حتحتاجها للمخاطبة في العمل والكتابة زي كتابة الإيميلات مثلاً. عشان كدا مهم شديد تخلي اللغة الإنجليزية في خطتك. في مواد كتيرة متوفرة في اليوتيوب أو اي مركز لغة كويس.


reaction:

تعليقات