القائمة الرئيسية

الصفحات

اهم المؤشرات الممكن تفرق بيها بين عقود العمل الحقيقية و المزورة للوظائف الخليجية..


كيف تفرق بين العقد الحقيقي والعقد المزورة
اهم المؤشرات الممكن تفرق بيها بين عقود العمل الحقيقية و المزورة للوظائف الخليجية:

عقود العمل في العادة بتجي من مصدرين.. يا أنهم يكونو جايين من جهة عمل بشكل مباشر او تكون جاية من وكالة.. الوكالات نفسها ممكن تكون جوا السودان او تكون في البلد المفروض تشتغل فيهو..

فإحنا لازم دايما نتأكد انو العقد جاي من جهة العمل المعنية فعلا.. ودا بكون عن طريق الإنتباه للتالي:


1- طالبين قروش او لا:
 إذا العقد نفسو مكتوب فيهو انك لازم تدفع قروش الفيزا او إجراءات التوظيف فدا ممكن يدل على انو العقد مزور ودا لأنو جهات العمل في الخليج مابتدفع زول قروش الفيزا..

اما لو الوكالة هي الطالبه قروش فأنت مفروض ما تدفع ليهم اي شي مقدم ودايما خلي الدفع بعد تسافر و تنزل الشغل لانو في وكالات كتيره وهمية وبتضرب الناس بالدفع المقدم.. ماتدفع شي مالم تشتغل ودا بشمل تذاكر الطيران واي شغل تاني الوكالة مفروض تعملو ليك.. دا حقك بالقانون..

-----------------

2- تفاصيل العقد والتصميم بتاعو:
في العادة العقودات المزورة بتكون مصممة بشكل بدائي و غير إحترافي ومن النظرة الأولى عليها ممكن تتعرف انها وهمية...

وفي تفاصيل كتيره في العقد ممكن تلفت نظرك منها عدم وجود أختام توثيق من الجهات الحكومية على العقد او ممكن تكون في اختام ولكن غير واضحه...
وطبعا اي عقد جاي السودان لازم يكون موثق من سفارة البلد الجاي منها في السودان..

ببساطة للتأكد ممكن تشيل العقد وتمشي السفارة وتسأل من صحته..

------------------------

3- تفاصيل الوكالة نفسها:

لو الوكالة كانت في الخليج فغالبا بتكون كشركة توظيف مهمتها توفير موظفين للشركات والمؤسسات المتعاقدة معاها.. ودا شي شائع في الخليج.. فالمطلوب منك انك تتأكد من انو الوكالة دي حقيقية وماتكون وهمية..
وممكن تعرف كدا بالبيانات البتوفرها الوكالة دي.. لازم يكونو كاتبين ليك عنوان واضح ورقم تلفون (أرضي) و إيميل رسمي..
كل المؤسسات في الخليج في تعاملاتها الرسمية بتتعامل بالتلفونات الأرضية.. مافي جهة بتتعامل برقم موبايل.. ومافي جهة مابتذكر عنوان مكاتبها..  ومافي جهة بتتعامل بإيميل غير رسمي (يعني يكون تابع لموقعها الرسمي وليس للهوتميل او الجيميل مثلا)..

---------------------------

4- تفاصيل جهة العمل:
لازم تتأكد انو الشركه او المؤسسة اللي العقد مرسل بإسمها حقيقية..
فتش عنها في قوقل.. كل الجهات الحقيقية بكون عندها موقع رسمي او عنوان في خرائط قوقل.. فتش على رقم التلفون بتاعهم واتصل وإتأكد من قسم التوظيف او الموارد البشرية HR عن صحة العقد المرسل ليك..

----------------------------

5- قيمة المرتب:
إذا المرتب كان كبير بصورة مبالغ فيها مقارنة مع متوسط الرواتب في البلد للمهنة المعنية او مقارنة برواتب المؤسسة نفسها (لو كان في مؤسسة بالإسم المذكور) فدا ممكن يدل على انو العقد مزور..

برضو المرتب لو مكتوب بعملة مختلفه عن عملة البلد الفيها الشغل (بالدولار مثلا) فدا ممكن يكون دليل على الإحتيال لأنو كل الجهات هناك بتدفع بعملة البلد (مالم تكون حتشتغل في منظمة دولية إحتمال يكون في إستثناء)..

------------------------

6- المعاينة الشخصية:
لو ماعملو معاك معاينة Interview رسمية قبل مايرسلو ليك العقد دا ممكن يكون دليل على كذب الجهة البتتواصل معاك دي.. لأنو مهما كان حجم شهاداتك و خبرتك فدا مابيغني الجهات الحقيقية عن اداء معاينة معاك..

------------------

دي هي اهم النقاط المفروض تنتبه ليها وكل ما زادت المؤشرات دي في العقد المرسلنو ليك، كل مازادت إحتمالية التزوير..
في الأخر انت اعمل العليك والرزق من رب العالمين..

وبالتوفيق للجميع إن شاء الله

تعليقات