اذا بتبدأ تتعلم حاجة وبتكسل تواصل؟؟!
فالبوست دا حيفيدك كتير

خليني احكي تجربتي في الأول
قبل فترة انا كنت عاوز احسن نفسي في البرمجة
فعملت تحدي بسيط
قررت اني اقعد اتعلم برمجة لمدة ثلاثة ساعات في اليوم لمدة ثلاثة شهور

كانت تجربة ظابطة شديد انتهت بأنه البرمجة حاليا هي مصدر الدخل الاساسي بالنسبة لي ودي نعمة من ربنا تستحق الحمد

بس دي ما القصة
القصة اني أثناء فترة التحدي كنت بكتب عن الحاجات البتعلمها في صفحتي
بعديها عملت قروب بنفس اسم التحدي سميته ثلاثة ساعات تعلم (3hours learning)

الفكرة كانت انه اي حاجة اتعلمها في البرمجة اشاركها مع الناس في القروب


التجربة كانت مفيدة جدا بالنسبة لي
فاولا رسخت المعلومات البتعلمها لأني بنشرها
وثانيا فتحت لي مصدر دخل، لانه كتير من الناس بسبب اني بنشر عن البرمجة عرفوا اني مبرمج ف بتواصلوا معاي لو محتاجين لموقع او تطبيق

هسة بعد مرور سنة واكتر، انا فكرت ليه ما اشجع الناس على خوض التجربة دي برضو، بدون ما نحصر الموضوع على البرمجة بس
يعني في ناس كتيرة عاوزة تتعلم انجليزي او بزنس او تصميم او مونتاج او..  الخ وعندها نفس المشكلة انهم بقيفوا في نص المشوار

والحاجة دي حسب تجربتي سببها انه ماف زول بحفزهم عشان يواصلوا

انا عالجت المشكلة دي عن طريق اني كنت بنشر الحاجات الاتعلمتها في فيسبوك، فكنت مضطر اتعلم عشان الناس منتظراني اشارك الاتعلمته معاهم

طيب انت تستفيد من القصة دي شنو؟؟
البوست دا حاليا هو بمثابة بداية التحدي بالنسبة ليك انت
ما يهم عاوز تتعلم شنو
برمجة، لغة جديدة، مونتاج، رياضيات، تسويق...

المطلوب منك تلاتة حاجات بس

#اولا حدد انت عاوز تتعلم شنو
#ثانيا حدد عدد الساعات الممكن تخصصها عشان تتعلم الحاجة دي، ومالازم تلاتة ساعات (شوف الزمن المناسب معاك)
#ثالثا اي حاجة بتتعلمها انشرها في قروب 3 ساعات تعلم  تحت #هاشتاق معين (عشان الناس تقدر تتابع معاك) وخلي الحاجة دي التزام يومي بالنسبة ليك
انا شخصيا مبرمج بتاع php، بس حاليا قررت اخوض التجربة دي من جديد عن طريق اني اتعلم ريادة الأعمال  بصورة علمية
واي حاجة حأتعلمها حأنشرها في القروب برضو

وانا عاوز اي زول يخوض التجربة دي
لانها فعلا ممكن تعمل نقلة في حياتك


وصدقني عن اذا عملت الثلاثة خطوات دي حتتفاجئ بالنتيجة بعد فترة وجيزة، واسأل مجرب

بعد فترة وجيزة، حتحس نفسك بتتحسن كل يوم
وكونك بتنشر و بتساعد غيرك يتعلم، الحاجة دي حتحسن من حالتك النفسية بصورة ما طبيعية
دا بالإضافة لانه الكتابة في المجال الاخترته بساعدك في ترسيخ المعلومات

من الليلة ومن البوست دا اعمل ليك قائمة تعلم يومية

مش بتعرف قائمة المهام اليومية (to do list)

اعمل قائمة تانية كل يوم سميها قائمة التعلم اليومية
 (to learn list)
كل يوم بتصحى الصباح بتحدد انك عاوز تتعلم كذا وكذا وكذا
وفي نهاية اليوم بتنشر الاتعلمته في القروب 

جديد قسم : وظائف إدارية

إرسال تعليق